E. A. Mario - Canzona vesuviana

Se ne sagliesse â parte d'Uttajano
Chi vò campà cujeto, si vò bbene
Saccio ’na casarella fore mano
Cu dduje balcune e, attuorno, 'e tterre chiene
'E resedà e garuofane schiavune

Jenche ’e ciardine 'e rrose 'a primmavera
Ll'autunno, 'mmiez'ê vvigne, mena ll'oro
Ce canta 'o core mio, matina e sera
E, tutto ll’anne, ’o core mio suspira

E saglie 'o core mio ’ncopp'â muntagna
Addò ll'ammore 'o vò fà fà ’a vennegna:
Vase ca sò cchiù meglio d' 'o sciampagne
E, quann' 'a 'ncigne, è tennera e sanguegna
'Sta vocca rossa ch'è 'a cchiù bella vigna

Acene d'uva songo 'e vase doce
E cchiù arzulenta è ll'uva, e cchiù mme piace
Chella è 'a passiona che mm'abbampa e coce
Chella è 'a passiona ca mme fa felice

Saglimmo a dduje! Cantammo! E canta ll'eco
Pe' 'mmiez'a 'e chiuppe d' 'a muntagna amica
E ce desiderammo... 'O ppenzo, 'o vveco
Lapillo 'e fuoco è 'ammore, quanno trica
E trica, e ce fa ardente a poco a poco

E nuje saglimmo. E stammo 'ncielo quase
Luntane, veco casarelle e chiese
Ah, che funiculare songo 'e vase!
Nuje ce vasammo e ghiammo 'mParaviso