E. A. Mario - Santa Lucia luntana

Partono 'e bastimente
Pe' terre assaje luntane
Cantano a buordo:
Sò napulitane!

Cantano pe' tramente
'O golfo già scumpare
E 'a luna 'a 'mmiez' ô mare
'Nu poco 'e Napule lle fa vedè

Santa Lucia
Luntano 'a te
Quanta malincunia!
Se gira 'o munno sano
Se va a cercà furtuna
Ma, quanno sponta 'a luna
Luntano 'a Napule
Nun se pò stà!

E sonano… ma 'e mmane
Tremmano 'ncopp' ê ccorde
Quanta ricorde, ahimmé
Quanta ricorde!

E 'o core nun 'o sane
Nemmeno cu 'e ccanzone:
Sentenno vvoce e suone
Se mette a chiagnere
Ca vò turnà!
Santa Lucia
Luntano 'a te
Quanta malincunia!
Se gira 'o munno sano
Se va a cercà furtuna
Ma, quanno sponta 'a luna
Luntano 'a Napule
Nun se pò stà!

Santa Lucia, tu tiene
Sulo 'nu poco 'e mare
Ma, cchiù luntana staje
Cchiù bella pare!

È 'o canto d' 'e Ssirene
Ca tesse ancora 'e rrezze
Core nun vò ricchezze:
Si è nato a Napule
Ce vò murì!

Santa Lucia
Luntano 'a te
Quanta malincunia!
Se gira 'o munno sano
Se va a cercà furtuna
Ma, quanno sponta 'a luna
Luntano 'a Napule
Nun se pò stà!