Ernesto De Curtis - Paese che 'ncatena!

Sto fore Napule
Nun tengo palpite:
Ll'amice, 'e ffemmene
'Na cena a ll'aria…
Che libbertà!
Strate nove, gente nova
Parlatura furastera
Pur' 'a luna veco, 'a sera
Meglio 'e Napule spuntà…

Paese che 'ncatena!
Te lasso pe' dispietto 'e chistu core
Felice 'e te lassà;
E me ne rido 'e chi, pe' simpatia
Quanno te sta luntano, vularria
'N'auciello addeventà…

Sto fore Napule!
Nu cchiù Pusilleco
C' 'o mare soleto
Cu 'a varca a cconnola
Pe' nun durmì…
Che ne faje chisti bbellizze
Cu 'na spina dint' ô core
Ca, si 'a tuocche, fa delore
Si t' 'a scippe… può murì?…
Paese che 'ncatena!
Te lasso pe' dispietto 'e chistu core
Felice 'e te lassà;
E cu 'sti bell' amice 'ncumpagnia
'Sta vita, ca me resta, vularria
Luntano 'a te passà!

Pecché se scetano
Tutt' 'e cchiù tiennere
Ricord' 'e Napule?
Chiagneno… diceno:
"Te fid' 'e stà?
Che ne saje si, 'a te luntano
Chi te dà turmiente e pene
S'è cagnata e te vò bbene?
Che ne saje?… Te fid' 'e stà?…"

Paese che 'ncatena!
Te lasso pe' dispietto 'e chistu core
Felice 'e te lassà;
E mò… stanotte… – che malincunia! –
Stanotte, ardentamente, vularria
'N'auciello addeventà!

Paese che 'ncatena!