E. A. Mario - Priggiuniero 'e guerra

Mme songo ricurdato 'a strada e 'o nummero
E aggio truvato 'a porta comm'a quanno
D' 'o lunnerì a matina fin' ô sabato
Passavo 'e ssettimane faticanno

Felicità ca m'aspettave â sera:
Dduje figlie piccerille e 'na mugliera
Mò sò sagliuto e, invece, aggio truvato…
Vicino â porta scritto 'o nomme 'e 'n'ato

E mme sò 'ntiso 'e dicere:
"Chella ca vuje cercate nun sta ccà!
Ca rimanette vedova
Ma doppo, s'è turnata a 'mmaretà"

E io songo 'o muorto ch'è turnato a nascere
Mò 'o priggiuniero asciuto a libbertà

Ah, comme ce tenive a restà vedova!
Tu ca dicive: "'Ammore, quann'è ammore
Dura 'n'eternità, cchiù forte 'e ll'edera
Nemmeno 'a morte spartarrà 'sti core"

E invece 'a guerra è stata assaje cchiù forte
'A guerra è stata, è stata pe' mme 'a morte
'St'ammore ch'era eterno, ll'ha spezzato
Mò i' sò 'n'estraneo e tu 'a mugliera 'e 'n'ato
Meglio a restà 'nSiberia
Senza sapè ch'era succieso ccà!
Desideravo Napule
E 'nu penziero me diceva: "Va'!"

E sò turnato a dì: "Io mò sò libero!"
Ma a che me giova chesta libbertà!

No! 'Nnanz' ê figlie mieje tu nun hê 'a chiagnere!
Se pò accuncià 'stu fatto e sacc'io comme:
Ll'ommo songh'i', songh'io ca mme sacrifico!
Ll'ommo c'ha perzo tutto: 'a casa e 'o nomme

Io te ringrazio ca, restanno sola
Te sì privata e ll'hê mannate â scola
E quanno ancora te sì 'mmaretata
Sì stata ancora mamma affezionata

Si lloro te dicessero:
"Fance cuntente, parlace 'e papà!"
Dincello: "Era 'nu giovane
Ca maje nun se stancava 'e faticà

Po' jette 'nguerra e nun turnaje cchiù a Napule"
Di' 'sta buscia ca è cchiù d' 'a verità!
Da ogge in avanti, chesto ce 'o ppuò dicere
Ca ll'ombra mia risponne: "È verità!"