E. A. Mario - Passa 'a bandiera

Passa 'a fanfara e sona 'a marcia riale;
Passano 'e bersagliere e 'o Triculore
Vedenno 'e tre culure nazionale
Ognuno sente 'a Patria dint'ô core

Tutt' 'e guagliune corrono
Sbattono forte 'e mmane
E saje chi sò?
Sò 'e suldate 'e dimane!

Passa 'a bandiera
Sventola e va
Cuntenta e allera
'O viento 'a fa
E saje pecché
S'ha misa 'a nocca blummarè?
Passa 'a bandiera
E passa 'a Patria
E 'o rre

Guarda, sò tre culure e sò stracciate;
Gente e cadè e murì hanno viste assaje
Ma chille ca 'a bandiera ha cummigliato
Sò muorte ca nun murarranno maje

Tant'uommene salutano
Cu 'a mano 'e bersagliere
E saje chi sò?
Sò 'e suldate d'ajere!
Passa 'a bandiera
Sventola e va
Cuntenta e allera
'O viento 'a fa
E saje pecché
S'ha misa 'a nocca blummarè?
Passa 'a bandiera
E passa 'a Patria
E 'o rre

'N'ommo resta cu 'a capa cummigliata
Corre 'nu giuvinotto risuluto:
"E tu 'a bandiera nun ll'hê salutata?
Che? Nun 'a cride degna 'e 'nu saluto?"

Ma chillo scappa a chiagnere
Po' dice a 'sta minaccia:
" 'O bbi' chi sò?
Ll'aggio dato 'e ddoje braccia"

Passa 'a bandiera
Sventola e va
Cuntenta e allera
'O viento 'a fa
E pure a mme
Mme sbatte 'o core e saje pecché?
Passa 'a bandiera
E passa 'a Patria
E 'o rre