Ernesto Tagliaferri - Qui fu Napoli!

Va cu tte 'stu core amato
Pe' 'sta via ca porta a mmare
Llà sta Napule allummato
Mò ca scinne chesti ggrare
Vide 'o mare accumparè
Spanne ll'aria 'nu sapore
D'erba 'e scoglie e de magnà
'Na cantina 'e piscatore
Tene 'o lume pronto già
Fuoco e zzuccaro 'o mellone
Ce stennimmo 'nterr'arena
Neve e 'sprinia 'int' ô giarrone
'Ncielo 'e stelle e 'a luna chiena

E i' canto: "Qui fu Napoli!"
Nisciuno è meglio 'e me
Dimane penz' ê diebbete;
Stasera sò 'nu Rre!

Sentarraje 'ncopp'a ll'arena
Voce a stesa 'e marenare:
"Tira, ohé… ch' 'a rezza vene"…
"Forza, ohé… ch'aonna 'o mare"…
"Tira, arranca… Venga a mme"
Cu chitarre e llume a giorno
'Na varchetta passa e va
Rossa e verde è ll'acqua attuorno
Tu nun magne pe' guardà
E i' te vaso 'sta vucchella
Cu cchiù sfizio e passione
'Sta vucchella sciuliarella
'Nfos' 'e vino e de mellone
E i' canto: "Qui fu Napoli!"
Nisciuno è meglio 'e me
Dimane penz' ê diebbete;
Stasera sò 'nu Rre!

Vintun'ore… Ccà vvicino
'Nu rilorgio ll'ora sona
Forse è 'ammore, fors'è 'o vino…
'Sta faccella s'abbandona
Tu t'adduorme 'mbracci'a mme
Pe' cuperta tiene 'e stelle
Pe' cuscino chistu core
Nonna-nonna a 'st'uocchie belle
Sò 'sti vvoce 'e piscatore
Dint' ô suonno, smaniosa
Mò me vuò, mò me ne cacce
Po' te scite e, vrucculosa
T'annascunne 'int'a 'sti bbracce

E i' canto: "Qui fu Napoli!"
Nisciuno è meglio 'e me
Dimane penz' ê diebbete;
Stasera sò 'nu Rre!